👉 ৱেবাকুফ (পুনৰ): (২) অকণমান সজাগ হওছোন আহক ✍️

     ইন্টাৰনেট জগতৰ উৰাবাতৰি আৰু ভুৱাবাতৰিৰ বিষয়ে কিমান ক'ম আৰু কিমান লিখিম। কেইবাটাও প্ৰৱন্ধ ইতিমধ্যে লিখিলোঁ অইন বহুতেও লিখি আছে কিন্তু লাভ হ'লে তিলমাত্ৰও নহল। ছচিয়েল মেডিয়া আৰু ইন্টাৰনেটৰ সকলো কথাই চকুমুদি বিস্বাস কৰাসকলকে যে 'ৱেবাকুফ' বুলি কয় সেই বিষয়েও বিস্তৃতভাবে লিখিলো কিন্তু ফুটুকাৰ ফেন, কমক চাৰি দিনকদিনে বাঢ়িছেহে। ৰাতিপুৱা শুই উঠিয়েই তেনে ৱেবাকুফ এটাই দিয়া কিবা নহয় কিবা এটা চকুত পৰিবৈ যেনে ধৰক ভগৱানৰ ফটো এখন লাইক কৰি শ্বেয়াৰ কৰক ইমানজনক, সৌভাগ্য আপোনাৰ হাতৰ মুঠিত, শ্বেয়াৰ নকৰিলে কিন্তু দূৰ্ভাগ্যই আপোনাক ৰৌৰৱ নৰকত নেপেলোৱালৈকে খেদি ফুৰিব। 

আঐ দেহি, দেখিছেনে স্বয়ং ভগৱানো এতিয়া ৰৈ আছে আপোনাৰ লাইক আৰু শ্বেয়াৰৰ বাবেহে !! ইউনিছেফ বা ইউনেস্ক'ই আমাৰ প্ৰধানমন্ত্ৰী বা ৰাষ্ট্ৰীয় সংগীতক পৃথিৱীৰ শ্ৰেষ্ঠ ঘোষণা কৰাধৰণৰ চিৰসেউজ বোৰটো আছেই। 

     JIOৰ 4G সেৱা আৰম্ভ হোৱাৰ পাছত যেনিবা অইন কিবা ডিজিটেল আন্দোলন হৈছে নহৈছে নাজানো কিন্তু এনে বাৰ্তাৰ প্ৰচলন তীব্ৰ গতিত বাঢ়িবযে ধৰিছে ই খাতাং। বহুবছৰ আগতেই সমাপ্ত হোৱা বুলি ভৱা মিছা বাতৰি কিছুমানো আকৌ নতুন জীৱন লাভ কৰি তীব্ৰ গতিত পুনৰ প্ৰচলন হব ধৰিছে। ত্ৰিপুৰাৰ মুখ্যমন্ত্ৰী বিপ্লৱ দেৱে আৱিষ্কাৰ কৰা মহাভাৰতৰ দিনৰ ইন্টাৰনেটৰ সময়ত এনেদৰেই উৰাবাতৰি বা ভুৱাবাতৰিৰ প্ৰচলন আছিলনে নাই জনাৰ উপায় আমাৰ নাই কিন্তু বৰ্তমান সময়ত ই যে এটা কিমান ডাঙৰ সামাজিক ব্যাধিত পৰিণত হৈছে তাক আৰু ন কৈ দোহৰাৰ প্ৰয়োজন নাই।

কিমান মানুহৰ লগত যে এই মিছা বাতৰি বা উৰা বাতৰি প্ৰচলনৰ কথাক লৈ কাজিয়া কৰিছোঁ ভাবিব নোৱাৰি। মাজতে এবাৰটো আমাৰ চৰকাৰী WhatsApp Group এটাত এজন ওপৰ খাপৰ বিষয়াৰ লগত বাৰুকৈয়ে এখুন্দা লাগিছিল এনে ভুৱাবাতৰিৰ বাবেই।

     শেহতীয়াকৈ দেখিলেনে সোপাধৰাৰ উৰাবাতৰি এটাৰ বাবেই কিদৰে দুজন নিৰীহ যুৱকে নিষ্ঠুৰ ভাবে প্ৰান হেৰুৱালে। দুখ লাগে (ভিডিঅ'টো চোৱাৰ সাহস গোটাব নোৱাৰিলোঁ)।

অধিক দুখ এই বাবেই লাগে যে তথ্য প্ৰযুক্তিৰ উন্নতিৰ ইমান এটা সুন্দৰ হাততে লৈ ফুৰিব পৰা ব্যৱস্থাৰ ইমান বেছি দূৰ্প্ৰয়োগ। অথছ সেই হাতত লৈ ফুৰা যন্ত্ৰটোতে সকলো খিনি সমিধানো আছে, মাত্ৰ ব্যৱহাৰৰ অভাৱ। সচাই বৰ দূৰ্ভাগ্য জনক।

     শেহতীয়াকৈ মোৰ ভাল লাগিছে Assam Police ৰ চাইবাৰ ছেলৰ তৎপৰতা দেখি। যদিও আগতেই তেখেতসকল তৎপৰ হব লাগিছিল নহল, কিন্তু দেৰিকৈ হলেও হোৱা দেখি ভাল লাগিছে। যোৱা দুদিনতে উৰা বাতৰি প্ৰচলনৰ অপৰাধত কেইবাজনকো আটক কৰাটো হৈছে উচিত পদক্ষেপ। আমি আদৰণি জনাইছোঁ। এনে উৰাবাতৰি প্ৰচলনকাৰী সকলক মূহুৰ্ততে গ্ৰেপ্তাৰ কৰিব লাগে।

     শেষত সকলোলৈ পুনৰ অনুৰোধ কৰো ছচিয়েল মেডিয়া বেয়া নহয় খুউৱ ভাল বস্তু, কেৱল অকনমান আপোনাৰ সাৱধানতাৰ প্ৰয়োজন। ছচিয়েল মেডিয়াত পোৱা সকলো কথা চকু কান মুদি, বন্ধ কৰি বিস্বাস নকৰি অকনমান অনুসন্ধান কৰি লয় যেন। অনুসন্ধান কৰিবলৈও আপুনি একো কষ্ট কৰিব নালাগে, মাত্ৰ আপোনাৰ হাততে থকা ফোনটো ব্যৱহাৰ কৰি অলপ গুগলত ছাৰ্চ কৰিলেই হল। ইংৰাজীৰ 'ই'টো নজনা লৰাটো বা ছোৱালীজনীয়েও যদি য'ৰ ত'ৰ পৰা খুচৰি মুচৰি প্ৰেম, বিৰহৰ সুন্দৰ সুন্দৰ কৱিতা, ছৱি download কৰি নিজৰ ফেচবুক বা হুৱাটছ্ এপৰ DP, Status আদিবোৰ কৰিব শিকিব পাৰে (আৰম্ভনিৰে পৰা যদিও আমি এই এপবোৰ ব্যৱহাৰ কৰি আহিছোহক, এনেধৰণৰ কিছুমান কথা আমিয়েই ভালদৰে নাজানো) নিশ্চয় অলপ চেষ্টা কৰিলে এইদৰে অনুসন্ধান কৰিবও পাৰিব। ইমানদিনে এইবোৰ ব্যৱহাৰৰ অভিজ্ঞতাৰ পৰা আৰু এটা কথা কব পাৰো যে ছচিয়েল মেডিয়াত প্ৰকাশিত প্ৰায়বোৰ বাতৰিয়ে ভুৱাই হয়। সঠিক কোনটো বা ভুৱা কোনটো জানিবৰ বাবে দৈনন্দিন জীৱনত সাধাৰণ মেডিয়া যেনে টিভি, বাতৰি কাকত আৰু ছচিয়েল মেডিয়াৰ মাজত এটা সু সামঞ্জস্যৰ নিতান্তই প্ৰয়োজন (লগতে আপোনাৰ মগজুৰো)। 

আপোনাৰ অকনমান সাৱধানতাই হয়তো এজনৰ প্ৰান ৰক্ষাও কৰিব পাৰে। সজাগ হওক, সতৰ্ক হওক, নিজেও বাছক আনকো বছাওক।

ধন্যবাদ।

12/06/2018